Turi-turin: Si Laga Man

Maka sekali lit sada bapa. Tubuh anakna, tapi mate rusur. Jadi anakna sada i-gelarina si Laga Man, maka pet ia man nina. I-ukatna nakan sinokat, mintes keri! "Enggo nggeloh anakta enda" nina man ndeharana.

Pepagina i-ukatna dua nokat, e pe langnga besur, enggo keri. Janah reh warina reh tambahna nakan Si Laga Man, piah dungna enggo keri empat nokat, segantang, setumba dua tumba, empat tumba, senalih, tapi lenga besur si Laga Man.

"Lanai terasuhi anakta ende ku-akap", nina bepana; "enggo keri nakan senalih!"

Tambah warina, muat buena rusur nakan Si Laga Man, sekali i-sulangi nakan, sada kayo babi keri, janah pe sisa nakan ras bengkau ndai pe piahna keri kerina, piahna bapana lanai kenan. "Bage gia, gelah lampas mbelin anakku e" ate bapana.

Janah ibas wari pepaginna, i buatna sekali nari lembu, iraskenna motongsa ras seninana lembu ndai. Enggo kenca tasak, idilona anakna i-berekenna, i panna bengkau ndai keri kerina bagepe ras nakan. Bapana ras nandena lanai kenan.

"La nai terasuhi kita anak e, asakai terbuat kita, i-panna keri", nina bapana.

Ibas sada wari lawes me bapa Si Laga Man kukerangen, janah ibabana pe anakna na ikut. Seh kenca i kerangen, i suruh bapana me Si Laga Man kundul

"Ijenda ko kundul, ingani kampilta e, ola bene, ola ko lawes-lawes" nina bapana man Si Laga Man.

I tabah bapa Si Laga Man me sada batang kayu buah, i usur-usurna nabahsa, tapi lenga mbulak sadawari.

"Ota, anakku, kurumah kita, sebab wari enggo ben" nina bapana ndai man anakna.

Lawes me kalak ndai kurumah, janah seh kenca rumah mis ia man, janah elah kenca man Si Laga Man mis medem, rikut arih-arih me bapa Laga Man ras ndeharana.

"Ndai ku-tabah kayu buah si galang, lenga ndai mbulak, pagi enggo kuakap retap, uga akap ndu adi si bunuh anakta enda ndai" nina bapa Laga Man man diberuna.

"Labodalih" nina diberuna.

"Pepagi lampas dage kam erdakan" nina man diberuna.

"Owe!" nina ndeharana.

Pepaginna kenca elah man, "ota tempi kampilta, lawes ka kita ku kerangen segelah sitabah batang buah ndai man ranting" nina bapana man Laga Man.

Enggo kenca seh ibas kerangan, ibas inganna sindube, maka reh nina bapana man Laga Man "Ije kundulken, ingani kampilta e, ola ko lawes" nina

"Ula ko mbiar, idas uruk e nge aku, ula kari engko mbiar ka" nina pe bapana

"Kai pe labo aku mbiar bapa" nina si Laga Man

"Bage me dage ndo ku usur-usur kayu ndai ku tabah segelah mbulak" nina bapana.

Ben me matawari, janah mbulak kayu ndai, rikut pe enggo i dumpangna si Laga Man, manai pe ia teridah

Eggo me mate si Laga Man ate bapa. "Enggo mate anakku e ras seninana ndube" nina bapana ngerana bas pusuhna.

Kenca bage lawes ia kurumah, janah seh kenca i rumah katakenna man diberuna, maka si Laga Man enggo mate i dumpang kayu buah.

"Enggo mate anakta ndai" nina man ndeharana "Legi manuk kuteruh, gelah i geleh" nina pe ndeharana

E maka i legina manuk ndai "Enda manuk ndai nina man diberuna". Janah pe ilebuhna silihna arah jabu kenjahe.

"Kai silih" nina silihna arah jabu kenjahe nari

"Gelehi manuk enda, enggo mate permenndu si Laga Man." nina

"Oewe" nina, janah igelehna kerina manuk ndai.

Enggo kenca dung manuk ndai igeleh, janah pe i tasakken, makana man me ia kerina.

I ukatna me nakan, rikut man ia kerina ras silihna, bagepe ras turangna. Lalupa i dabohken turangna nakan sempukul ku teruh karang, bagepe ras bengkau manuk ndai.

Kenca kerina ia enggo elah man, isuruh silihna me bapa si Laga Man ngisap.

"Ndi, ngisapkën silih! kuga kin banci bahan pengindonta kin enggo bage silihku" nina bengkila si Laga Man.

Ngisap ia, janah "ndi kampil ndu ndai silih" nina bapa si Laga Man man silihna.

Kenca bage reh sora erlebuh i teruh nari. "O, bapa!" Nina

"Ise nge ndia si erlebuh bapa e silih" nina bapa si Laga Man

"Bagi sora si Laga Man ku akap" nina silihna.

"O, bapa! ija kucibalken ranting enda ndai?" nina si Laga Man nungkun

Tersengget bapana, i tungkirna arah pintun, idahna enggo rungga kerina ibas kesain, ampekenna kayu ndai ibas turena, rikut ture pe piah meruntuh.

"Kugalah e nake! enggo i babana kayu ndai kerina, janah ture ndai pe enggo meruntuh. Mate ningen, labo kepe mate, padahal ndai mate ateku ia. Kuga denga gelah ninta man bana" nina bapa Laga Man.

"Labo mbiar silih" nina bëngkila si Laga Man, "Aku giya ndilose ku rumah" nina

"Enggo baba ndu kerina ku rumah ranting ndai? Ture pe enggo meruntuh! Arah batang enda ndai saja kam kudatas" nina bengkilana man si Laga Man.

I bereken bengkilana me si Laga Man ngisap. Bapana enggo mbiar. Janah ikatakenna pe kerina anak kuta nastasi dahan-dahan kayu ndai. Janah itastasi me dahan kayu ndai jadi ranting.

Reh nina bapa si Laga Man "Buatlah kerbo sada gelah bere man ia. Rasken kerina nasakkensa jadi bengkau, enggo akapna latih mbaba ranting enda kerina, gelah bage si bere ia man" nina

Enggo kenca tasak, i atur kerina, i dilo pe si Laga Man man.

"Manken, anakku, enggo kam latih," nina bapana

Keri kerbo sada i-panna, ras bengkaoe kerina, ras nakan La nai kenan sada pe!

I-bereken bapana amak, janah nina: "to, medemken ku jamburta" nina man Laga Man

"Enggo kenca lawes si Laga Man tunduh, arih-arih ia kerina, bapa si Laga Man ras silihna, ras ginemgemna kerina.

"Kugalah perbanta ndia, arih-arih kita kerina" nina ginemgemna.

"Mesera me siakap kerina rukur, bage galangna kayu si tabah ndu ndai ndumpangsa, ibabana ku rumah, emaka kuakap susah rukur" nina pe ginemgemna e.

"Uga akapndu adi i gulangkan batu si galang i datas uruk nari, janah i suruh si Laga Man tedis arah berneh" nina bengkila Laga Man.

"Bage-bage," nina bapana, "silih mabaisa Laga Man ku berneh, kita kerina nggulangken batu e i datas nari" nina

Enggo sue arihna kerina guna munuh si Laga Man, janah enggo seh pe warina maka ibaba bengkilana si Laga Man ku berneh. Ibas ia erdalin ku berneh ras bengkilana, i teguna pe sadakambing. Seh kenca i berneh, itambatkenna pe kambing ndai.

"Ingani kambingta enda, aku lawes lebe muat rudang, ola tadingkendu, ola kari i pan arimo" nina bengkilana

"Lang! labo kutadingken adi lenga kam reh" nina si Laga Man man bengkilana.

Maka seh idas deleng bengkilana, i-raskenna engkuraksa kerina, ras ginemgemna, bagepe anak kuta kerina. Enggo me setengah teridah batu i kurak, emaka i ongkilna.

Melawen akapna reh bengkilana, erlebuh me si Laga Man: "Bengkila, bengkila, kotup!" nina erlebuh

"Kutup ongkil, lit kubegi sora i berneh" nina bengkilana.

E maka i kutupna kerina, minter erdelang batu ndai. E maka i dumpangna si Laga Man ngasa pelnat.!

Ku rumah kalak ndai kerina, janah buatna pe sada lembu man bengkauna man perbahan enggo latih akapna kerina. Janah lit pe ia deba si motong lembu ndai, janah deba nari erdakan. E maka kenca tasak nakan, minter ia man kerina.

"Ateku min enggo mati si Laga Man, i dumpang batu ndai, sebab meganjang kal batu e megulang idas deleng nari" nina bapa si Laga Man ngerana kenca elah man.

"Perbahan enggo latih siakap kerina, janah pe kita enggo man, rikut ras ngisap, maka lawes lah kita kurumahta sekalak-sekalak, sebab tik nari enggo ben" nina bapa si Laga Man pe tambah tolena man jelma si enterem.

Paksa ia ngerana-ngerana e, danak-danak enggo medem, perbapan ercakap-cakap denga kerina. Janah ibas kalak enda ndai ercakap-cakap reh me si Laga Man njujung batu si galang ndai.

"O, bapa!, ija ku ban batu enda ndai?" nina si Laga Man

"i jenam" nina bapana ngaloi, maka i benterken Laga Man me batu ndai i tengah kesain. Janah kena pe sada sapo i tindih batu si mbeli e.

"Enggo mehuli pe batu enda man kundul-kundulen kerina jelma" nina Laga Man ngerana ibas ukurna.

Kenca bage mbiar pe bapa Laga Man ras bengkilana i rumah, sebab enggo idahna batu ndai ibaba si Laga Man ku rumah.

"Uga arihta e ndilosa ia kurumah silih" nina bapa Laga Man man silihna.

"Ola mbiar, sebab adi kita mbiar tentu i bunuhna kita" nina bengkilana ngaloi. Maka lanai mbijar bapana, adi mate pe labo dalih atena ibas ukurna.

Janah lawes me bengkilana kuteruh i rumah nari ndilo si Laga Man. Janah kurumah pe ia ras permenna si Laga Man.

Seh i rumah, janah enggo kenca ia kundul, erbelas me si Laga Man.

"Ndai i suruh bengkila aku erjaga kambing arah berneh, janah lawes ia nina ndarami rudang, kepeken lawes ia nangkeng raduken kam kerina ngkurak batu si galang. Munuh aku kepe atekena kerina" nina si Laga Man.

"Adi munuh aku nu ate, ma bage; arih-arihlah kita kerina bapa ras nande ras bengkila, ras turangku kerina. Buatlah, nande! man bangku sada bunga-bunga pitu lambar, utang bibi cimpa pitu mpukul, bengkila rutang bulang-bulang sada lambar, turangku rutang kampil sada lambar, bapa rutang piso sada, mama rutang pementing sada" nina si Laga Man.

Enggo kenca i berekenna kerina pemindon si Laga Man, maka si Laga Man pe ngolihi erbelas.

"Ma adi bage, bapangku, nande, bengkila, bibi kerina, kam turangku kerina, kuteh nge mela kel ukurndu ngenehen aku, janah kune pe kita lalap ras, maka nakan si karaben pe lanai bo terbuat. Maka perbahan bage lawes menda aku, ngarap pe aku totondu segelah ola aku bangger-bangger" nina Laga Man erbelas. Kenca bage i tepuk Laga Man batu si galang ndai, janah lawes pe ia.

Maka lawes me si Laga Man niar-niar i tengah kerangen Limbu Raja. Ibas tengah kerangen, jumpa me ia ras Pengeletep si mata begu.

"Ise e?" nina si Pengeletep.

"Aku", nina si Laga Man.

"Sendah aku njumpam ras sukat raja," nina Pengeletep.

"E, toton maka jelma niar-niar kerangen enda" nina si Laga Man.

E, i-eltep si Pengeltep me si Laga Man.

"Buang sia! Man kai i eltep ko aku, kena pe labo i panna" nina si Laga Man

"Adi kam sekali saja ku tipak, banci kam mbestak seh ku datas awang-awang, la kam mbiar?" nina pe si Laga Man man Pengeletep.

"Kai kebiarenku!" nina si Pengeletep.

"Tuhu la ko mbiar?" nina si Laga Man.

"Tuhu" nina si Pengeltep.

Maka i ayaki si Laga Man, tipakna janah mestak me si Pengeletep seh ku awang-awang, e maka ndaboh, seh i teruh pinat pe Pengeletep janah mate.

I buat si Laga Man bunga-bunga nduba sitik, cimpa sitik, enda i tamana i babah si Pengeletep, minter ia nggeluh.

Nina si Pengeltep : "Nembah aku bandu, ola aku ibunuh ndu, si ngembah-ngembah kampilndu lah gia aku."

"Em katangku ndai, mintes ko merawa ngenehen aku, bujur kukataken man bam" nina si Laga man, janah ras pe kalak ndai duana erdalin.

I tempi si Pengeltep kampil si Laga Man. Duana ia erdalin ras niar-niar kerangen Limbu Raja, janah ibas sada wari jumpa ia ras Pengerintak Buluh Sungsang.

"Kuja nge atekena niar-niar" nina Pengerintak Buluh Sungsang.

"La rarangen jelma ibas kerangen Limbu raja" nina si Laga Man.

"Engkai maka lang nindu?" nina si Buluh Sungsang.

"Ma lit enggo si ngataken bage dekahku niar-niar ibas kerangen Limbu Raja" nina si Laga Man.

"Aku pe mbelin-mbelin ibas tengah kerangen enda!" nina si Buluh Sungsang; "Lenga bo pernah aku jumpa jelma bagi kam ena cakapna" nina.

"Radu jumpa kita sendah; di la kam mate, aku mate; sendah kam meriah me!" nina si Laga Man.

Maka i rintak Buluh Sungsang sada buluh si mbur, seh pe meruah ras taneh terus ku uratna. Emaka i tutukenna Si Laga Man, nuruk si Laga Man arah teroh. E maka i tipak si Laga Man, minter kicat si Buluh Sungsang. Maka tangis pe Buluh Sungsang.

"Enam katangku ndai menai kita arih-arih, mintes kam merawa" nina si Laga Man.

"Adi bage, nembah aku, tangtang dage nahengku e" nina Buluh Sungsang.

I tangtangi si pengeletep Buluh Sungsang.

"Enta dage piso e" nina Buluh Sungsang. E maka i bereken si Laga Man. I takilna buluh ndai, maka inemna pe launa.

Kenca bage i bere si Laga Man ngisap Buluh Sungsang. Ngisap ia teluna. Enggo ras ngisap, janah ertutur pe ia.

"Janari kam!" nina Buluh Sungsang.

"Aku erdalin-dalin, perbahan ibunuh nande bapangku atena aku, rikut ras turangku kerina, e maka aku erdalin-dalin" nina Laga Man.

"Ise dage gelarndu teman?" nina si Buluh Sungsang.

"Gelarku si Laga Man" nina Laga Man

"Temanndu e, ersenina kam duana?" nina ka si Buluh Sungsang.

"Lahang". nina Laga Man

"Dage ise gelarna?" nina Buluh Sungsang.

"Si Pengeltep Begu" nina Laga Man.

"Adi bage Ola nai kita rubat teluna, kam bapa kami duana" nina Buluh Sungsang.

Kenca bage lawes ka ia erdalin teluna, i bentasina pe pitu lapis deleng, ibas deleng peenemken ngadi ia ngisap-ngisap. Janah kenca seh ia i datas deleng si pepituken e, i idahna me idatas nari sada kuta, nusur ia ku kuta e, janah idahna pe jelma perdagang lada.

Kenca bage ku sapo me kalak e teluna, janah sapo si i dahina e, e me sapo pengulu dagang. I bereken kalak e me pengulu ndai ngisap. I bereken pengulu ka pe isapna man kalak ndai.

"Aku kuteruh ntisik" nina pengulu janahna nusur kuteruh, niar-niar ginemgemna kerina lit lima puluh kalak. Janah i kataken pengulu e pe man kerina ginemgemna gelah pulung.

Emaka arih-arih kerina ia ije, janah ngerana pe pengulu ndai man ginemgemna. Nina: "Lit jelma telu kalak ku sapo dagangta enda, perbahan kerehen kalak si telu e, erbahan mbiar kalak ku bas sapo e" nina pengulu dagang.

"Si saja kalak si telu e, gelah si pan" nina ginemgem man pengulu.

"Bage" nina pengulu e ngaloi. Kenca bage, maka nggarut piso me ia kerina.

Kenca enggo dung ia kerina nggarut, maka lawes me ia kerina ku sapo. Maka seh kenca ia i sapo e, i lebuh pengulu ndai me kalak ndai teluna.

"Kuteruh kam teluna silih, gelah ngisap kita" nina pengulu dagang ndai.

"Baci" nina si Laga Man

Idah si Laga Man enggo mbentar kerina piso. Maka i buat si Laga Man sempukul cimpa ras bunga-bunga, maka i cidurina, i putarina temanna ras ia.

Nusur ia, i berekenna pengulu ngisap, mintes i takil ginemgem si Laga Man ras temanna, seh ngasa ciger wari lalap kalak ndai telunal enga mate, sebab ma telap piso kalak e. Perbahan enggo latih i akapna nakil si Laga Man ras temanna, tapi lalap la mate, kiam me dungna pengulu ras ginemgemna. Sanga kalak e kiam, i ayaki Laga Man me ia, janah i tundukna, rikut ras i bunuhna pe pengulu e.

Mbiar pe kerina gimengem e nangdangi Laga Man. Tapi ibas sie ngerana me si Laga Man man bana kerina.

"O, teman kerina, enggo puas atendu kerina nakili kami, pagi-pagi nari asa ben wari. Gia bage labo kam ibunuh kami, sebab iteh kami kap, maka ibunuhndu pe atendu kami teluna perbahan kata pengulu dagang nge. Perbahan pengulu dagang enggo mate, maka kam labo i bunuh kami. Ola kam mbiar" nina si Laga Man.

"Nembah kami kerina, ola kami i bunuh" nina ginemgem.

"Lahang" nina si Laga Man.

E maka i-berekenna ginemgem ndai kampilna man si Laga Man ras temanna. Ialoken Laga Man kampil ndai, janah ngisap pe ia. Ginemgem deba muat tebu, kulitina, janah i berekenna man si Laga Man.

I pan si Laga Man ras temanna tebu ndai, janah kenca enggo keri. "Kudatas kita" nina si Laga Man

Janah ku sapo me kalak ndai kerina, deba ia erdakan, deba enggeleh manuk, janah enggo kenca tasak kerina, dilona si Laga Man ras temanna, janah radu ras ia kerina man, lima puluh dua kalak ia teremna.

Perbahan enggo gelap wari, maka dung kenca ia kerina man, maka minter pe ia medem. Janah terang kenca wari, arih-arih ka ia kerina.

"Lawes kita ku juma, gelah kita ercakap" nina kalak ndai kerina cakap-cakap sapih-sapih ia.

Ndarat si Laga Man, janah ngerana ia "Ku juma saja kena kerina, barang-barang la banci bene" nina man kalak ndai.

E maka ku juma kerina ginemgem ndai nongkati lada. Si Laga Man i sapo tading. Janah piah tande sada bulan dekahna, mengelngel pe niakap si Laga Man dungna. Tapi adi lawes ningen, mbiar ka ia bene barang-barang silit ibas sapo e.

Perbahan bage, arih-arih kame ia dungna ras temanna si dua kalak ndai. Janah ibas ia arih-arih e, sue pe arihna segelah erbahan sekalak ia si tading i sapo jadi pengulu dagang.

Gia enggo pe ibahanna kerin guna jadi pengulu dagang singian sapo, tapi tetap kang la tertahan si Laga Man ras temanna tading i kuta e. Janah ibas sada wari ngerana ka ia mulihi man kerina ginemgem, janah nina: "Ma tertahan kami kundul-kundul ijenda, lawes lah kami, janah ibas sada wari pagi reh ka kami" nina kalak si telu e man kerina ginemgem.

"Enggo ku suan sinuan-sinuan enda i duru saponta. Adi melus pagi, bangger me ia atendu, janah lawes kam dua kalak entah telu kalak ndahi aku" nina si Laga Man man kalak ndai.

E maka lawes ia teluna erdalin kempak matawari ben. Setengah wari erdalan jumpa ia sada kuta. I idahna enggo melenget kel kesain kuta e. Janah nungkur ibas benteng nari sekalak diberu, nina diberu e: "Ola erdalin-dalin kam ibas kesain. I janari kin kam ndai?" nina

"Ajangku lanai ernentu bibi" nina si Laga Man

"Adi manai ernentu, di mesikel kam ijenda, banci. Tapi ola kam erdalin-dalin ibas kesain e, lit merawa manuk si gurda-gurdi," nina diberu e.

"Labo aku mbiar bibi; mate me totonku, tapi lalap la mbera pengindongku" nina si Laga Man.

"La pe mbera nina pengindoku nindu, mbue kalak mate ibas kuta enda, enggo keri i pan manuk si gurda-gurdi. Ma idah kam enggo melungen kuta enda?" nina diberu e.

"Epe labo aku mbiar" nina si Laga Man.

"Adi terbunuhndu kin manuk si gurda-gurdi, maka enggo salib kam jadi raja ibas kuta enda; sebab enggo i keriken manuk si gurda-gurdi turang kami", nina diberu ndai.

"Baci ku bunuh" nina ka si Laga Man ngaloi.

"Mari ku bas dage kam, talangi pintun enda, ola melawen, reh kari ia idahna kita, mate kita" nina diberu e.

"E banci kami kubas" nina si Laga Man.

I talangina pintu e, kenca kubas ia teluna i tutupna ka pintun e.

Seh kenca ia ibas, ercakap ia kerina, lit ia pitu kalak buena.

"Uga belinna manuk si gurda-gurdi e bibi?" nina si Laga Man.

"E mbelin mama!, lit belang kabengna sedepa sembelah, em belinna" nina diberu ndai.

"E kin ngenca si ngkeriken jelma ibas kuta enda?" nina si Laga Man.

"Owe mama!" nina diberu ndai.

Ben kenca wari i asap si Laga Man me pedangna si belangna asa bulung galuh, emaka i turapna pedang e alu cimpa ndube. Janah itadingkenna Buluh Sungsang ras Pengeletep ibas keben ras diberu ndai; ndarat si Laga Man nimai si Gurda-gurdi ibas kesain.

Janah idahna sirang dua puluh depa nari ilap si Gurda-gurdi ndai.

"E manuk ndai" ate si Laga Man. Janah irintakna pisona, emaka i kesabina jekjek ibas kesain.

I tangkis manuk si gurda-gurdi piso si Laga Man, janah sada nari kabeng manuk e enggo namburi si Laga Man, janah i keskes si Gurda-gurdi pe si Laga Man ibas kabengna e.

"Enggo melus kuning pengulunta, sendah kita erdalin kempak matawari ben" nina pengulu dagang si i tama Laga Man ndube. Enggo kenca ia jumpa, idahna nahe si Laga Man, nahena ngenca teridah, sebab dagingna i tamburi kabeng si gurda-gurdi. Maka i-rintakna ibas perpadanen si Laga Man, embusina igungna, e maka mulihi ka ia nggeluh; janah manuk gurda-gurdi ndai enggo mate.

Ercakap si Laga Man ras pengulu dagang. Janah lawes pe ia ku keben diberu, janah pe arih-arih ia ije kerina.

"Sada e ngenca gelgel ngkeriken jelma? nina si Laga Man noengkoeni

"Owe mama" nina diberu e.

"La nai kita mbiar erdalin ibas kesain." nina si Laga Man ngerana man diberu e janahna lawes erdalin-dalin. I siar-siarna kerina kuta e, janah barang si meherga i pepulungna.

Kenca ben wari, ngerana me si Laga Man: "Lanai lit jelma ibas kesain enda; ngena atendu aku, segelah man bangku kam?" nina man diberu e.

"Ngena" nina diberu e. E maka i empoina diberu e. Sada man si Laga Man, sada man si Pengeletep, sada man si Buluh Sungsang. Emaka isahken si Laga Man jadi anak beruna si Buluh Sungsang, janah Pengeletep jadi anak beru Pengulu Dagang.

Maka lawes me pengulu dagang ras anak beruna. Erdalin ia, janah kenca ia seh i dagang nungkun ginemgem man bana, nina "Uga berita penguluta si Laga Man?" nina nungkun man pengulu dagang.

"Enggo dat kami ia, janah labo ia mate, sebab enggo i embus kami igungna salu embus-embus perpadanen" nina pengulu e njababsa.

"Merandal adi payo kin la ia mate, gia enggo melus bulung kuning ndube, kuakap kin pe enggo mate, sebab melawen kuidah kam reh" nina ginemgem ndai.

"Kami melawen reh perbahan ercakap-cakap kami" nina pengulu.

"Kai cakap kena?" nina ginemgem.

"Cakap empo" nina pengulu

"Ise man bana?" nina ka ginemgem e nungkun.

"Endam kap, enggo baba kami dua kalak Pengeletep ras ndeharana, ijah tading dua kalak nari man si Laga man ras si Buluh Sungsang" nina pengulu e.