Oleh: A. Tarigan
Ibas sada berngi, i jambur kuta nuri-nuri me Pa Pincala (Pa Pincala e gelar dilo-dilon A. Tarigan enda) man kerina kalak si pulung ije, judulna Turi-turin Iyo-iyo Pagar Batu, maka mulai me ia nuri-nuri:
"Ibas Urung Sinembah, i Karo Jahe Simalem, lit me ije sada kuta gelarna Pagar Batu. Ibas kesain rumah gugung e, ideherken dalin kulau lit ije sada batu galang si mbue mangkuk-mangkukna, eme bagi lubang main lopet. Ibas lubang batu enda me nai rusur ibahan putar belo, sini ipalitken ibas perdempaken sini igelari pagar, adi tupung lit kenca kerja pepitulayoken, entah pe sangana berkat ermusuh, ibas zaman ermusuh-musuh nai. Batu si galang ndai, igelari kalak batu pagar, entah e nge ndube dalanna maka gelar kuta e ibahan Pagar Batu, e labo lit kel singingetsa, perbahan kuta e, sada kuta singgo metua" nina Pa Pincala menaken turi-turin si adi.
Selain batu pagar si lit ibas kesain rumah gugung e pe, lit ka sada erbage nari tanda-tanda si lit hubungenna ras kuta e, e me sada batu si nigelari pagar, si jadi bere-beren kuta e nai-nai nari. Batu enda labo galang, belinna asa batu daliken ngenca, tapi batu enda tempa i ganai, sebab lit dagingna, tanna, kerahungna ras takalna, matana, igungna, babahna ras bagepe cupingna, lengkap kerina, amin lagia mejile kel popona.
Batu enda ndai cigar awak ngenca kudas, janah e pe labo si etehkel ise si erbahanca ras si namakenca ije. Ingan batu bere-beren enda ndai e me ibas sada uruk gelarna uruk Gerat Lembu, tandem ibas umpe-umpe babo kuta e, i koko alu tare emas, selantam, kalinjuhang ras sidebanna. Nina kalak si enggo metua ibas kuta e, sanga zaman ermusuh-musuh nai, adi lit kencang musuh ibas kuta sideban nari si atena lako merangi kuta Pagar Batu enda, sope terang wari enggo me terbegi rusur sora lebuh-lebuh ibas batu e nari, sorana sayup-sayup pergangna, tapi kerina kalak megisa: "mmmmmmmmmuuuuuuusuuuuuuh!" nina me ibegi sorana.
Adi enggo ersora batu pagar bere-beren ndai, e tuhu maka adi la papagina entah pe kedunna kel lahgia, enggo me reh musuh guna merangi kuta e. Erkiteken si e, ngenca ibegi sora batu e erlebuh, minter me ipesikap kanak-kanakina kerina anak kuta, gelah ula nari la lit bedil si la erdepur sanga ermusuh e. Adi musuh reh arah kenjahe, minter me itimai ibas uruk babo lau penggulangen takal-takal, janah adi reh arah kenjulu, itimai me ibas lau bilik deherken sampuren kulikap si launa merap marpar perban ganjangna. Adi reh arah matawari ben, itimai me ibas genting, si dalan mentas bagi berambing manuk ngenca iakap perbelangna.
Teluna ingan nimai enda ndai, cukup strategis nina kin kalak si genduari, emaka ibas ermusuh e, labo enggo pernah talu anak kuta Pagar Batu e. Sada nari ka si erhanca anak kuta e la pernah talu, e me sope denga berkat ermusuh, iputari me lebe kerina anak dilaki si berkat, ras bage pe diberu-diberu si ngembahken nakan ras inemen. Adi putarna megera, ia ikut berkat ku permusuhen, sebab kalak si bage jarang kena timah nina si nurikena. Tapi, adi putar belona mbelas-mbelas pergarana, entah pe mbulan, kalak si bage la ibere ikut ermusuh, sebab tendina melayah, nina guru si peberkatsa, janah kalak si bage kange tuhu buen si jadi korban kena timah ibas permusuhen e.
Si tuhuna maka menganjang ras mbar pe beritana kuta Pagar Batu e, labo erkiteken batu pagar si dua erbage e, janah labo perbahan la pernah talu ermusuh e ngenca, tapi lit ka sada erbage nari si erbahan kuta e terberita, eme nina turi-turin, ibas kuta e lit rusur jumpa kalak pasir-pasir emas, si belinna lit kasa kersik, kasa beras, janah mawen-mawen lit kalak si jumpa kasa biji jaung e belinna. Erkiteken si e, ibas kuta Pagar Batu ndai lit penuangen emas, pirak ras suasa, lako njadiken pasir-pasir emas e jadi bura-bura, cincin, keroncang, dancing, anggir-anggir ras sidebanna.
Tapi kedungenna, berita emas e enggo lanai ibegi, idarami pe ibas ingan si rusur jumpai nai, e me ibas ulu lau penggulangen takal-takal ras tepi-tepi lau e arah kawes kemuhen, lanai enggo pernah lit kalak ndatsa. Tapi kedungenna, e me ibas waktu si langa kugakel dekahna, lit me sada rombongen kalak asing si meriksa taneh i sekeliling kuta Pagar Batu e, janah nina lit nge ije ijumpasa emas, tapi langa danci ibuat perbahan langa metuasa nina. "Entah ndigan maka enggo metua, e ia nari nge je" nina Pa Pincala tole nuriken turi-turin e.
Pa Pincala nerusken turi-turinna nina:
Sada nari e me i kuta Pagar Batu nari, lit sada dalin ngenangkih uruk e, e me mentasi sada tangga batu si lancip, ijah-ije lit batu si mugur-ugur janah li ka si medalit, si erbahanca labo kerina kel kalak pang mentas arah tangga batu e.
Ngenca dung rumah ras pantar sini isuruh Kemberahen e ibahan, lawes me Kemberahen ku datas Uruk Embang Perteguhen e, ije me ia tading sementara nina ukurna. Ngenca pagi terbiasa anak raja e tading ras nandena si mupus, ije me pagi maka aku mulih, gelah ola lit nari si man ukuren sibayak negri enda, selain majuken rakyat negri, bageme ate Kemberahen ibas ukurna.
Tapi ngenca Kemberahen e tading i datas Uruk Embang Perteguhen e ras piga-piga kalak kawan-kawan bage pe si erdahinna, labo ketenengen sini idatsa, tapi ate megogo, ukur si serbut dingen ermbera-bera megiken berita, maka anak raja e rusur berusaha nulus ngenangkih uruk si meganjang e arah tanga batu si lancip e. Mbiarkel Kemberahen, ibas sada wari la lit si ngidahsa, emaka ndabuh ia ibas tangga batu e nari, je mate. Mbayangken kejadin e, enggo lit perkertangna kula Kemberahen, man pe lanai iakapna entabeh, muat tunduhna pe enggo me akapna mesera. Emaka tiap berngi me Kemberahen ndai rende erdidong doah, ndidong doahken anak raja si atena mekuah e ibas ingana si ndauh nari.
Sora ndidong doah Kemberahen ndai, terbegi melangen-langen ku kuta Pagar Batu, erbahan kerina kalak si megisa enggo terlolah-lolah ibas dahin sini dahina nari. Janah la rakyat si enterem ngenca terlolah-lolah megi didong doah Kemberahen e, tapi anak rsini ididong doahkenna ibas ingan si ndauh e nari pe, lebihen dengan ka atena gegetna nandangi Kemberahe e. emaka labo ia ngai nulus bagi sini iarapken Kemberahen ndai, tapi reh paditnge jadina.
Ibas sada wari sanga ise pe la ngidahsa, lawaes ka me anak raja e ngenangkih tanga batu si lancip e, tapi langa pe menganjangsa kel ia, terdedehsa me sada batu si medalit, si erbahan anak raja ndai ndabuh mulini kuteruh. Kerina dagingna enggo meroro, janah sembelah pahana enggo penggel. Megi berita si e, seh me cedana ate Kemberahen. Sada nari si erbahanca ertambah-tambah atena ceda, e me erkite-kiteken Sibayak si rusur i akap beluh ertimbang e, ikut nalahken Kemberahen, ia me akapna si erbahanca maka anakna e sempat ndabuh ibas tangga batu e. Ngukuri si e lanai me tanggung-tanggung ate Kemberahen cedana, e maka lanai erngadi-ngadi ia tertangis ngandung, nangisi padan pengindona si lanai langlang gogona e.
Ibas sada wari, turah me sada inspirasi ibas ukur Kemberahen, e me iendekenna sada ende-enden si lanai kin langlang jilena ras lemukna laguna, janah kata-katana pe sehkel risona, erbahan ate megogo janah lit ka si erbahanca ukur megendek jadi malap. Bage me ende-enden sini ibahan Kemberahen e, sini ibahan kalak gelarna Iyo-iyo Pagar Batu, perban anggukna menam-menam seri ras iyo-iyo si enggo lit. Saja ngenca Iyo-iyo Pagar Batu enda, ndauh lemuken ras rison laguna asangken iyo-iyo sideban.
Emaka endeken Kemberahen kencang Iyo-iyo Pagar Batu e ibas pantarna idatas Uruk Embang Perteguhen e, kalak si erdahin ijuma kerina enggo ngelolahken tegunna, aron si erdahin i sabah pe minter si cikenken cangkulna ia kerina, bage pe perlanja si sangana mentas arah dalan mbelin, minter si amparken babanna ia kerina, lako megiken Iyo-Iyo Pagar Batu si melenget mriso e. Ngenca puas megiken Iyo-iyo Pagar Batu e, piga-piga perlanja mentas e naruhken luahna, e me barang binagana man Kemberahen si ringan ibas Uruk Embang Perteguhen e, sebab ngenca kin i begina sora iyo-iyo e, kelatihenna erdalan si bage dauhna pe enggo akapna mambar, ukurna si serbut ras gulut ngukuri geluh ibabana pe enggo akapna salang, janah tedehna nandangi anak ras ndehara, bage pe ras kerina kade-kade si tading, ikut akapna ambar kerina.
Kerna ende-enden Iyo-iyo Pagar Batu e, pedas me mbar ku si belang-belang, ibaba perlanja mentas e ku kuta-kuta si deban sini bentasina, ras ku kutana sekalak-sekalak. Erkiteken si e, enterem me kalak si reh ku kuta Pagar Batu lako megiken Iyo-iyo si lanai langlang jilena e. Li si reh i taneh jahe-jahe nari, lit ka si reh i taneh gugung nari. Kalak si reh enda kerina, buen erbaba luah man Kemberahen si erbahan lagu e, emaka enggo rula-ula Kemberahen e kai pe ibas inganna.
Ibas rombongen kalak si reh e, enterem ka nikut kalak permanga-mangga, si atena lako mpelajari lagu e. Tapi, permanga-mangga e pe labo kerina ngasup ngendeken Iyo-iyo Pagar Batu e, perban iyo-iyo si mbaru e perlu sora megerning dingen melemuk, bage pe sora merengget. Janah sanga ngendeken ende-enden e, ijah ije perlu petolen kesah, emaka enterem pe si reh, merak-rak ngenca si beluh ngendekensa.
Perban Iyo-iyo Pagar Batu e seh ate kalak ngenana kerina, janah labo enterem kalak si beluh dingen ngasup ngendekenca, emaka ija lit kalak si beluh ngendekenca, mepalar me kalak reh lako megikenca. Janah adi lit kencang kalak si erdenden ate ceda ibas jabuna, entah pe enterem kalak si kedabuhen sinanggel ibas sada kuta, ibahan me lakon erkata gendang, janah itenahken me permanga-mangga si mejile sorana, janah beluh ngendeken Iyo-iyo Pagar Batu e sebab enggo kenca ibegi lagu e iendeken permanga-mangga, naisai-naisai sitik me ate mesui ras ukur picet si erbahan sinaggel nggeluh e.
"Bage me turin-turinna kerna lagu Iyo-iyo Pagar Batu e, ma enggo mbelang beritana ku kenjahe kenjulu, janah ngasa genduari enterem denga kel kalak si merincuh megikenca" nina Pa Pincala ndungi turi-turin e.
Bendi-bendi sinasa bendi-bendi ibas rumah simbaru e
Enggo ikoce gelah kayuna pe lanai erpulut-pulut
Sebegi ras la sibegi gia sekali iyo-iyo simbaru e,
naisai-naisai sitik gelah ukurta si serbut ras si gulut
alu bage rumpah me page ersuli
sarap jadi pelabuh bas gantang ber-beru bulung si malem-malem
adi bage naisai me kerina ate mesui
sangap kita enggeluh, janah turah ateta malem
Sumber: https://groups.yahoo.com/neo/groups/tanahkaro/conversations/topics/7343
Ibas sada berngi, i jambur kuta nuri-nuri me Pa Pincala (Pa Pincala e gelar dilo-dilon A. Tarigan enda) man kerina kalak si pulung ije, judulna Turi-turin Iyo-iyo Pagar Batu, maka mulai me ia nuri-nuri:
"Ibas Urung Sinembah, i Karo Jahe Simalem, lit me ije sada kuta gelarna Pagar Batu. Ibas kesain rumah gugung e, ideherken dalin kulau lit ije sada batu galang si mbue mangkuk-mangkukna, eme bagi lubang main lopet. Ibas lubang batu enda me nai rusur ibahan putar belo, sini ipalitken ibas perdempaken sini igelari pagar, adi tupung lit kenca kerja pepitulayoken, entah pe sangana berkat ermusuh, ibas zaman ermusuh-musuh nai. Batu si galang ndai, igelari kalak batu pagar, entah e nge ndube dalanna maka gelar kuta e ibahan Pagar Batu, e labo lit kel singingetsa, perbahan kuta e, sada kuta singgo metua" nina Pa Pincala menaken turi-turin si adi.
Selain batu pagar si lit ibas kesain rumah gugung e pe, lit ka sada erbage nari tanda-tanda si lit hubungenna ras kuta e, e me sada batu si nigelari pagar, si jadi bere-beren kuta e nai-nai nari. Batu enda labo galang, belinna asa batu daliken ngenca, tapi batu enda tempa i ganai, sebab lit dagingna, tanna, kerahungna ras takalna, matana, igungna, babahna ras bagepe cupingna, lengkap kerina, amin lagia mejile kel popona.
Batu enda ndai cigar awak ngenca kudas, janah e pe labo si etehkel ise si erbahanca ras si namakenca ije. Ingan batu bere-beren enda ndai e me ibas sada uruk gelarna uruk Gerat Lembu, tandem ibas umpe-umpe babo kuta e, i koko alu tare emas, selantam, kalinjuhang ras sidebanna. Nina kalak si enggo metua ibas kuta e, sanga zaman ermusuh-musuh nai, adi lit kencang musuh ibas kuta sideban nari si atena lako merangi kuta Pagar Batu enda, sope terang wari enggo me terbegi rusur sora lebuh-lebuh ibas batu e nari, sorana sayup-sayup pergangna, tapi kerina kalak megisa: "mmmmmmmmmuuuuuuusuuuuuuh!" nina me ibegi sorana.
Adi enggo ersora batu pagar bere-beren ndai, e tuhu maka adi la papagina entah pe kedunna kel lahgia, enggo me reh musuh guna merangi kuta e. Erkiteken si e, ngenca ibegi sora batu e erlebuh, minter me ipesikap kanak-kanakina kerina anak kuta, gelah ula nari la lit bedil si la erdepur sanga ermusuh e. Adi musuh reh arah kenjahe, minter me itimai ibas uruk babo lau penggulangen takal-takal, janah adi reh arah kenjulu, itimai me ibas lau bilik deherken sampuren kulikap si launa merap marpar perban ganjangna. Adi reh arah matawari ben, itimai me ibas genting, si dalan mentas bagi berambing manuk ngenca iakap perbelangna.
Teluna ingan nimai enda ndai, cukup strategis nina kin kalak si genduari, emaka ibas ermusuh e, labo enggo pernah talu anak kuta Pagar Batu e. Sada nari ka si erhanca anak kuta e la pernah talu, e me sope denga berkat ermusuh, iputari me lebe kerina anak dilaki si berkat, ras bage pe diberu-diberu si ngembahken nakan ras inemen. Adi putarna megera, ia ikut berkat ku permusuhen, sebab kalak si bage jarang kena timah nina si nurikena. Tapi, adi putar belona mbelas-mbelas pergarana, entah pe mbulan, kalak si bage la ibere ikut ermusuh, sebab tendina melayah, nina guru si peberkatsa, janah kalak si bage kange tuhu buen si jadi korban kena timah ibas permusuhen e.
Si tuhuna maka menganjang ras mbar pe beritana kuta Pagar Batu e, labo erkiteken batu pagar si dua erbage e, janah labo perbahan la pernah talu ermusuh e ngenca, tapi lit ka sada erbage nari si erbahan kuta e terberita, eme nina turi-turin, ibas kuta e lit rusur jumpa kalak pasir-pasir emas, si belinna lit kasa kersik, kasa beras, janah mawen-mawen lit kalak si jumpa kasa biji jaung e belinna. Erkiteken si e, ibas kuta Pagar Batu ndai lit penuangen emas, pirak ras suasa, lako njadiken pasir-pasir emas e jadi bura-bura, cincin, keroncang, dancing, anggir-anggir ras sidebanna.
Tapi kedungenna, berita emas e enggo lanai ibegi, idarami pe ibas ingan si rusur jumpai nai, e me ibas ulu lau penggulangen takal-takal ras tepi-tepi lau e arah kawes kemuhen, lanai enggo pernah lit kalak ndatsa. Tapi kedungenna, e me ibas waktu si langa kugakel dekahna, lit me sada rombongen kalak asing si meriksa taneh i sekeliling kuta Pagar Batu e, janah nina lit nge ije ijumpasa emas, tapi langa danci ibuat perbahan langa metuasa nina. "Entah ndigan maka enggo metua, e ia nari nge je" nina Pa Pincala tole nuriken turi-turin e.
Pa Pincala nerusken turi-turinna nina:
Sada nari e me i kuta Pagar Batu nari, lit sada dalin ngenangkih uruk e, e me mentasi sada tangga batu si lancip, ijah-ije lit batu si mugur-ugur janah li ka si medalit, si erbahanca labo kerina kel kalak pang mentas arah tangga batu e.
Ngenca dung rumah ras pantar sini isuruh Kemberahen e ibahan, lawes me Kemberahen ku datas Uruk Embang Perteguhen e, ije me ia tading sementara nina ukurna. Ngenca pagi terbiasa anak raja e tading ras nandena si mupus, ije me pagi maka aku mulih, gelah ola lit nari si man ukuren sibayak negri enda, selain majuken rakyat negri, bageme ate Kemberahen ibas ukurna.
Tapi ngenca Kemberahen e tading i datas Uruk Embang Perteguhen e ras piga-piga kalak kawan-kawan bage pe si erdahinna, labo ketenengen sini idatsa, tapi ate megogo, ukur si serbut dingen ermbera-bera megiken berita, maka anak raja e rusur berusaha nulus ngenangkih uruk si meganjang e arah tanga batu si lancip e. Mbiarkel Kemberahen, ibas sada wari la lit si ngidahsa, emaka ndabuh ia ibas tangga batu e nari, je mate. Mbayangken kejadin e, enggo lit perkertangna kula Kemberahen, man pe lanai iakapna entabeh, muat tunduhna pe enggo me akapna mesera. Emaka tiap berngi me Kemberahen ndai rende erdidong doah, ndidong doahken anak raja si atena mekuah e ibas ingana si ndauh nari.
Sora ndidong doah Kemberahen ndai, terbegi melangen-langen ku kuta Pagar Batu, erbahan kerina kalak si megisa enggo terlolah-lolah ibas dahin sini dahina nari. Janah la rakyat si enterem ngenca terlolah-lolah megi didong doah Kemberahen e, tapi anak rsini ididong doahkenna ibas ingan si ndauh e nari pe, lebihen dengan ka atena gegetna nandangi Kemberahe e. emaka labo ia ngai nulus bagi sini iarapken Kemberahen ndai, tapi reh paditnge jadina.
Ibas sada wari sanga ise pe la ngidahsa, lawaes ka me anak raja e ngenangkih tanga batu si lancip e, tapi langa pe menganjangsa kel ia, terdedehsa me sada batu si medalit, si erbahan anak raja ndai ndabuh mulini kuteruh. Kerina dagingna enggo meroro, janah sembelah pahana enggo penggel. Megi berita si e, seh me cedana ate Kemberahen. Sada nari si erbahanca ertambah-tambah atena ceda, e me erkite-kiteken Sibayak si rusur i akap beluh ertimbang e, ikut nalahken Kemberahen, ia me akapna si erbahanca maka anakna e sempat ndabuh ibas tangga batu e. Ngukuri si e lanai me tanggung-tanggung ate Kemberahen cedana, e maka lanai erngadi-ngadi ia tertangis ngandung, nangisi padan pengindona si lanai langlang gogona e.
Ibas sada wari, turah me sada inspirasi ibas ukur Kemberahen, e me iendekenna sada ende-enden si lanai kin langlang jilena ras lemukna laguna, janah kata-katana pe sehkel risona, erbahan ate megogo janah lit ka si erbahanca ukur megendek jadi malap. Bage me ende-enden sini ibahan Kemberahen e, sini ibahan kalak gelarna Iyo-iyo Pagar Batu, perban anggukna menam-menam seri ras iyo-iyo si enggo lit. Saja ngenca Iyo-iyo Pagar Batu enda, ndauh lemuken ras rison laguna asangken iyo-iyo sideban.
Emaka endeken Kemberahen kencang Iyo-iyo Pagar Batu e ibas pantarna idatas Uruk Embang Perteguhen e, kalak si erdahin ijuma kerina enggo ngelolahken tegunna, aron si erdahin i sabah pe minter si cikenken cangkulna ia kerina, bage pe perlanja si sangana mentas arah dalan mbelin, minter si amparken babanna ia kerina, lako megiken Iyo-Iyo Pagar Batu si melenget mriso e. Ngenca puas megiken Iyo-iyo Pagar Batu e, piga-piga perlanja mentas e naruhken luahna, e me barang binagana man Kemberahen si ringan ibas Uruk Embang Perteguhen e, sebab ngenca kin i begina sora iyo-iyo e, kelatihenna erdalan si bage dauhna pe enggo akapna mambar, ukurna si serbut ras gulut ngukuri geluh ibabana pe enggo akapna salang, janah tedehna nandangi anak ras ndehara, bage pe ras kerina kade-kade si tading, ikut akapna ambar kerina.
Kerna ende-enden Iyo-iyo Pagar Batu e, pedas me mbar ku si belang-belang, ibaba perlanja mentas e ku kuta-kuta si deban sini bentasina, ras ku kutana sekalak-sekalak. Erkiteken si e, enterem me kalak si reh ku kuta Pagar Batu lako megiken Iyo-iyo si lanai langlang jilena e. Li si reh i taneh jahe-jahe nari, lit ka si reh i taneh gugung nari. Kalak si reh enda kerina, buen erbaba luah man Kemberahen si erbahan lagu e, emaka enggo rula-ula Kemberahen e kai pe ibas inganna.
Ibas rombongen kalak si reh e, enterem ka nikut kalak permanga-mangga, si atena lako mpelajari lagu e. Tapi, permanga-mangga e pe labo kerina ngasup ngendeken Iyo-iyo Pagar Batu e, perban iyo-iyo si mbaru e perlu sora megerning dingen melemuk, bage pe sora merengget. Janah sanga ngendeken ende-enden e, ijah ije perlu petolen kesah, emaka enterem pe si reh, merak-rak ngenca si beluh ngendekensa.
Perban Iyo-iyo Pagar Batu e seh ate kalak ngenana kerina, janah labo enterem kalak si beluh dingen ngasup ngendekenca, emaka ija lit kalak si beluh ngendekenca, mepalar me kalak reh lako megikenca. Janah adi lit kencang kalak si erdenden ate ceda ibas jabuna, entah pe enterem kalak si kedabuhen sinanggel ibas sada kuta, ibahan me lakon erkata gendang, janah itenahken me permanga-mangga si mejile sorana, janah beluh ngendeken Iyo-iyo Pagar Batu e sebab enggo kenca ibegi lagu e iendeken permanga-mangga, naisai-naisai sitik me ate mesui ras ukur picet si erbahan sinaggel nggeluh e.
"Bage me turin-turinna kerna lagu Iyo-iyo Pagar Batu e, ma enggo mbelang beritana ku kenjahe kenjulu, janah ngasa genduari enterem denga kel kalak si merincuh megikenca" nina Pa Pincala ndungi turi-turin e.
Bendi-bendi sinasa bendi-bendi ibas rumah simbaru e
Enggo ikoce gelah kayuna pe lanai erpulut-pulut
Sebegi ras la sibegi gia sekali iyo-iyo simbaru e,
naisai-naisai sitik gelah ukurta si serbut ras si gulut
alu bage rumpah me page ersuli
sarap jadi pelabuh bas gantang ber-beru bulung si malem-malem
adi bage naisai me kerina ate mesui
sangap kita enggeluh, janah turah ateta malem
Sumber: https://groups.yahoo.com/neo/groups/tanahkaro/conversations/topics/7343
Tidak ada komentar:
Posting Komentar